काठमाडौं- नेपाली कांग्रेसको केन्द्रीय समिति बैठकमा युवा नेताहरुको समूहका तर्फबाट गगन थापाले लिखित प्रतिवेदन प्रस्तुत गरेका छन्।
मंगलबारको बैठकमा केन्द्रीय सदस्य थापाले ५१ पाना लामो प्रतिवेदन पेश गरेका हुन्।
थापाको समूहमा रहेका चन्द्र भण्डारी, धनराज गुरुङ, प्रदीप पौडेल, रघु घिमिरे, वद्री पाण्डे सहितका नेताले प्रतिवेदन तयार गरेर पार्टी बैठकमा पेस गरेका हुन्।
जनताको अपेक्षालाई पूरा गर्ने भन्दा पनि निराश बनाएका कारण चुनाव हारिएको युवा नेताहरुले बुझाएको प्रतिवेदनमा उल्लेख छ। 'कांग्रेसले जनअपेक्षा अनुरुप काम गर्न सकेन, सुशासन दिन सकेन, परिणाम देखाउन सकेन, जनताप्रति उत्तरदायी र जवाफदेही भएन', भनिएको छ, 'कोसित त गरेकै हो भन्ने विश्वासिलो आधार पनि जनतालाई दिन सकेन।'
लोकतन्त्रको सवलताको लागि जुन क्षेत्र बलियो र प्रभावकारी बनाउनुपर्थ्यो तिनै निकायहरु चर्को राजनीतिकरणका कारण पार्टी अत्याधिक अप्रभावकारी र कमजोर बन्न पुगेको प्रतिवेदनमा भनिएको छ।
जनताबाट पाएको मतादेशलाई आम नागरिकको हितमा प्रयोग गर्ने भन्दा पनि फगत पार्टीका केही महानुभावको सत्तारोहणको लालसालाई पूरा गर्नमा कांग्रेसको परिचय बनेको भनिएको छ।
प्रतिवेदनमा कांग्रेसको कमजोरीका कारण उसको मैदानमा कम्युनिष्टको खेल सहज भएको उल्लेख छ। 'खेल मैदान हाम्रो, नियम हाम्रो, खेल हाम्रो, के उनीहरुले अत्याधिक राम्रो खेलका हुन् त? होइन। त्यसोभए कसरी त? हामीले २०४८ देखि खेल मैदानको ठूलो हिंसा खालि छोडेर सानो हिस्सामा मात्रै सीमित भयौं', प्रतिवेदनमा भनिएको छ।
२०४८ पछिको समयमा नेपाली कांग्रेस अस्तित्व संकटबाट ग्रस्त भएको बताइएको छ।
पार्टीले अवलम्बन गर्दै आएको समझदारी र भागबण्डाको अवधारणा छाड्नुपर्ने प्रस्ताव प्रतिवेदनमा गरिएको छ। पार्टी महाधिवेशन पछाडि विधान विपरितका जति पनि संरचना बनेका छन्, सबैलाई तत्काल खारेज गर्न प्रस्ताव गरिएको छ।
समीक्षाको क्रममा समेत गम्भीर विषयहरु उठेकाले महासमितिबाट ती विषयहरुलाई सम्बोधन गर्नुपर्ने प्रस्ताव युवा नेताहरुले राखेका छन्।
संघीय प्रणालीका नयाँ संरचना बनेकाले त्यहाँ महाधिवेशन बैठकबाट संशोधित विधान पारित गरी शीघ्र महाधिवेशनमा जान माग गरिएको छ।
पार्टीको नेतृत्व भने महाधिवेशनले नै टुंग्याउने विषय भएको प्रतिवेदनमा उल्लेख छ। तर अहिलेकै नेतृत्वको निरन्तरता खोज्नु भनेको जनादेश र मतादेशलाई नबुझिएको उल्लेख छ। '०४८ सालयता जसरी विचार र संगठनमा ढोका बन्द भए त्यसरी नेतृत्वमा रहेका पुराना मान्छेको स्वभाविक बहिर्गमन र नयाँ मान्छेको आगमन नहुनाले एजेन्डा, विचार र क्षमताको दृष्टिले पार्टी जमेको पोखरी जस्तो भएको छ। पार्टीको चुस्त संगठन चलाउन प्रष्ट सैद्धान्तिक खाका त कोर्यौं तर त्यसलाई चलाउने नेतृत्व सिथिल र यथास्थितिवादी छ भने संगठनमा गतिशीलता कसरी आउँछ', प्रतिवेदनमा भनिएको छ, 'त्यसैले अहिलेकै नेतृत्वको निरन्तरता खोज्नु जनादेश र मतादेशलाई नबुझ्नु नै हो।'
हेर्नुहोस् दस्तावेजको पूर्ण पाठः
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
